SAN JOSE, DINAGAT ISLANDS — Malampusong gipahigayon sa Local Government Unit (LGU) sa San Jose, sa pakigtambayayong sa Department of Social Welfare and Development (DSWD), ang 3rd Quarter Social Pension Payout alang sa mga indigent senior citizens sa lungsod niadtong Hulyo 28–30, 2026.

Ang maong payout kabahin sa padayong pagpatuman sa social pension program nga nagtumong sa paghatag og pinansyal nga tabang sa mga kwalipikadong indigent senior citizens, ilabi na kadtong adunay limitadong tinubdan sa panginabuhian ug nanginahanglan og dugang suporta alang sa ilang adlaw-adlaw nga panginahanglan.

Sa kinatibuk-an, 2,498 ka senior citizens ang nalista isip mga benepisyaryo alang sa 3rd Quarter payout. Gikan niini, 2,446 ang malampusong nakadawat sa ilang social pension, samtang 52 ka benepisyaryo ang wala pa makakuha sa ilang pension tungod sa lain-laing wala damhang kahimtang o personal nga mga rason.

Gisubay usab ang mga wala ma-claim nga pension gikan sa nangaging quarters. Adunay 5 ka unclaimed pension gikan sa 1st Quarter ug 8 gikan sa 2nd Quarter, nga kadaghanan nalambigit sa pagbalhin o pagpuyo sa mga benepisyaryo sa mga lugar nga layo na sa lungsod.

Alang sa mga benepisyaryo nga wala pa makakuha sa ilang 3rd Quarter social pension, mahimo pa nilang ma-claim kini sa sunod nga 4th Quarter Payout, subay sa mga patakaran, requirements, ug pamaagi nga gilatid alang sa maong programa.

Gipasaligan usab nga ang pagdumala ug paghatag sa social pension magpadayon nga himuon sa koordinasyon sa mga hingtungdan nga opisina ug partner agencies aron masiguro ang hapsay nga proseso sa paghatod sa benepisyo ngadto sa mga kwalipikadong senior citizens.

Nagpasalamat ang LGU San Jose sa tanang opisyal ug personnel nga mitabang sa pagpatuman sa maong payout, ingon man sa San Jose Senior Citizen Federation ug San Jose Retirees Association, alang sa ilang kooperasyon, koordinasyon, ug suporta sa pagsiguro sa hapsay nga pagserbisyo ngadto sa mga benepisyaryo.

Ang maong kalihokan nagpakita sa padayong paningkamot sa lokal nga panggamhanan, uban sa mga partner agencies, sa paghatag og matinud-anon, hapsay, ug episyenteng serbisyo publiko alang sa mga senior citizens.

Isip kabahin sa responsibilidad sa LGU San Jose sa pagpalambo sa kaayohan sa mga senior citizens, magpadayon ang lokal nga panggamhanan sa pagpalig-on sa koordinasyon ug pagpatuman sa mga programa nga nagtubag sa ilang mga panginahanglan ug naghatag og dugang suporta alang sa ilang kaayohan ug dignidad.