Opisyal nang giablihan pag-usab ang 24/7 nga operasyon sa Birthing Facility sa San Jose niadtong Mayo 26, 2026 pinaagi sa turnover ceremony nga gitambongan sa mga opisyales sa LGU-San Jose nga gipangulohan ni Mayor Ruben J “Kking” D. Zuniega, uban sa mga healthcare workers sa lungsod.

Mibalik ang 24 oras nga operasyon sa maong pasilidad human malimitahan kini atol sa pagpaayo sa mga kadaot nga nasinati niini human sa pag-agi sa Bagyong Odette.

Lakip sa mga serbisyong mahimong ma-avail mao ang pagpa-anak, Family Planning Services, Maternal and Neonatal Care Package, ingon man Cervical ug Breast Cancer Screening.

Giprayoridad sa lokal nga panggamhanan ang rehabilitasyon ug pagpalig-on sa maong pasilidad aron masiguro ang padayon ug episyenteng paghatag og serbisyo panglawas alang sa katawhan sa lungsod.

Sa iyang mensahe, nagpahayag si Mayor Ruben J “Kking” D. Zuniega sa iyang paglaum nga mas daghan pang mahatag nga improvements sa maong pasilidad sulod sa iyang pagserbisyo sa lungsod. Matud pa niya, dili lamang ang kalidad sa serbisyo ang angay hatagan og pagtagad, kundili apil usab ang kahimtang ug kaayohan sa pasilidad alang sa mas maayong pag-alagad sa katawhan.

Nagpasalamat usab si Dr. Princess Benna Ecleo sa suporta sa lokal nga panggamhanan ug sa tanang nitabang ug misuporta sa rehabilitasyon ug pagpalambo sa Birthing Facility aron mapadayon ang maayong serbisyo niini alang sa mga residente sa lungsod.