Niadtong Pebrero 20, 2026, malampusong gipahigayon ang Focus Group Discussion (FGD) kabahin sa Persons with Disability (PWD) sa SB Session Hall, Sta. Cruz, San Jose, Dinagat Islands.

Tumong niini ang pagsuta sa kahimtang ug pagpalambo sa mga programa ug serbisyo alang sa mga PWD sa lokal nga komunidad.

Ang kalihokan gipangulohan ni Dr. Maureen Ava Mata, Project Manager sa WOWLeap, ug Carmen Reyes Zubiaga, Presidente sa WOWLeap . Mitambong usab si Mayor Ruben J D. Zuniega ug Vice Mayor Richard Pasquil, uban sa mga representante gikan sa PNP, MPDC, MDRRMO, Sangguniang Bayan, MEO, ug mga focal persons ug miyembro sa WOWLeap – Samahan ng Kababaihang may Kapansanan.

Ang WOWLeap usa ka organisasyon nga nagtinguha sa pagpalig-on sa abilidad sa mga babayeng adunay kapansanan pinaagi sa pagpalambo sa usa ka enklusibo nga komunidad ug pagtabang nga mahimong aktibo silang kabahin sa tanang aspeto sa katilingban.

Gipahayag sa mga miyembro nga dako ang kausaban nga nadala sa WOWLeap sa ilang kinabuhi. Daghan ang nakakat-on sa pagsulti sa atubangan sa publiko nga walay kaulaw, mas nasabtan ang ilang mga katungod, ug mas lig-on ang ilang kumpiyansa sa kaugalingon.

Atol sa FGD, gihatagan og higayon ang tanang partisipante sa pagpaambit sa ilang mga plano sa kalambuan ug mga kalihokan alang sa umaabot nga tulo ka tuig.

Ang tanang opinyon nagpakita sa dakong potensyal ug bililhong kontribusyon sa komunidad sa pagpalambo sa kahimtang sa mga PWD.

Ang kalihokan nagpamatuod nga dako kaayo ang importansya sa suporta ug mga programa alang sa mas epektibo nga serbisyo sa Persons with Disabilities (PWD) sa lungsod sa San Jose.