SAN JOSE, Dinagat Islands — Gipahigayon ang Levelling Session sa Pagsubay sa mga Proyekto sa Imprastruktura sa lungsod niadtong Marso 12, 2026 sa MPDC Building, Municipal Compound sa Sta. Cruz, isip kabahin sa padayon nga paningkamot sa lokal nga panggamhanan nga mapalig-on ang implementasyon sa mga proyekto.

Ang maong kalihokan kabahin sa programa nga SubayBAYAN (Subaybayan ang Proyektong Bayan), nga nagtumong sa pagpalambo sa sistema sa monitoring ug evaluation sa nagkalain-laing imprastruktura ug programa sa lungsod. Tumong niini nga masiguro nga ang matag proyekto epektibo, transparent, ug nagtubag sa tinuod nga panginahanglan sa komunidad.

Atol sa sesyon, gihisgutan ug gikoordinar sa mga partisipante ang angay nga mga pamaagi aron mapadali ang implementasyon sa mga proyekto ug malikayan ang mga kalangay. Gipasiugda usab ang kahinungdanon sa lig-on nga koordinasyon tali sa nagkalain-laing opisina aron masiguro ang hapsay ug organisadong pagpatuman.

Gipangulohan sa Department of the Interior and Local Government (DILG) ang kalihokan, uban sa partisipasyon sa mga opisyal ug empleyado sa lokal nga panggamhanan, lakip si Municipal Engineer Alex T. Navarra, Engr. Froilyn T. Fuentes, EnP., MPDC/MHRMO-Designate, Engr. Ariane T. Buhian, Engr. Sany Olpos, Statistician I Doncie M. Paquibot, Municipal Accountant Sarah Faith A. Catubig, CPA, ug si Vice Mayor Rechard T. Pasquil.

Pinaagi sa maong inisyatiba, gilauman nga mas mapalig-on pa ang kapasidad sa LGU sa pagdumala sa mga proyekto sa imprastruktura, ug mapadali ang paghatag og serbisyo sa katawhan. Nagpasiugda usab kini sa kahinungdanon sa accountability ug transparency aron masiguro nga ang mga proyekto sa gobyerno magpabiling epektibo ug mapuslanon alang sa tanan.